7 IPhone Hidden Features مميزات مخفية فى أيفون هتخلى حياتك أسهل بكتير



موبايلات أيفون أغلبها متشاركة معا بعض فى مميزات لو عرفتها و استخدمتها هتخلى حياتك أسهل بكتير و زى ما اتكلمنا عن أول 6 مميزات فى Iphone من هنا

هنكمل بقية المميزات اللى أكيد مش كلها تعرفها و لو عرفتها هتريحك من الطرق التقليدية اللى بتاخد منك وقت

نكمل المميزات معا أيفون و الميزة الأولى و اللى شخصيا بنشوفها مفيدة جدا و أكيد هتفيدك لو بتكتب حاجة و محتاج تعدل فى اللى بتكتبه بسهولة كل اللى عليك تعمله انك تضغط ضغطة قوية على الكيبورد لو بتستخدم كيبورد أبل اللى بييجى بشكل افتراضى معا النظام 

و مجرد ما تضغط على الكيبورد ضغطة قوية هتلاقى ان الكيبورد اتحول لحاجة شبه الماوس ممكن من خلاله تحرك مؤشر الكتابة لأى مكان تحبه
و ممكن بضغطة تانية لنفس المكان هتقدر انك تحدد على اللى انتا كاتبه و طبعاتختار انتا محدد على ايه وتشوف هتعمل نسخ ولا قص و لا ايه و بصراحة الميزة ديه مفيدة جدا و بننصحكم تجربوها

الميزة التانية و اللى أكيد لو ما تعرفهاش هتعانى كتير جدا و ده لأنها مفيدة جدا فى الألة الحاسبة و اللى بتخليك تعدل على الأرقام اللى انتا كتبتها بسهولة و ده عن طريق انك تسحب بصباعك على الأرقام من اليمين للشمال و ده اللى هيخليك تمسح الارقام اللى انتا كتبتها بسهولة و مش شرط تمسح الرقم كله و طبعا لو متعرفش الميزة ديه هتطضر انك لو كتبت رقم غلط فى وسط عملية حسابية لازم تصفر الألة الحاسبة من الأول و تعيد الحسبة تانى وده لأن مفيش طريقة لمسح رقم واحد بس


الميزة التالتة هتريحك للأبد من الصداع بتاع التطبيقات اللى كل شوية تطلب منك انك تدل تديها تققييم على متجر التطبيقات و الميزة ديه ببساطة بتمنع أى تطبيق انه يطلب منك تقييم فى المستقبل و أكيد هتريحك أكتر لو فعلتها 

و بتكون عن طريق دخولك على ال Settings أو الاعدادات و بعدين تختار ITunes & App Store و هتفتح قايمة جديدة اختار منها in-App Ratings & Reviews واعملها تشغيل

الميزة الرابعة و اللى تعتبر مهمة جدا للناس اللى بتهتم بالتصوير و أكيد انتا واحد منهم 
الميزة ببساطة انك بتروح للاعدادات و بعدين بتختار الكاميرا و تفعل المربعات أو Grid فطبعا بتعملك الخطوط المشهورة اللى بتكون فى الكاميرا علشان تظبط الكادر بتاعك و انتا بتصور أى مشهد و ديه حاجة سهلة جدا و كل الناس عارفاها و موجودة فى كل الموبايلات بس المختلف هنا انك لما بتستخدمها فى وضع التصوير الأفقى بيظهرلك علامة زائد و فيه علامة زائد تانية بتتحرك و انتا المفروض تظبط علامة الزائد الأولى على العلامة التانية و لما بتظبطهم بتكون بتصور بوضع أفقى بزاوية 90 درجة فالصورة بتطلع مثالية زى ما انتا عايزها بالظبط جربها و أكيد هتاخد بالك من الفرق

و الميزة الخامسة ممكن يكون فيها شوية انتهاك للخصوصية و ديه حاجة غريبة شوية على أبل و هيا ببساطة انك تقدر تضيف أيقونة لمركز التحكم اسمها السمع و ده عن طرق انك تفتح الاعدادات و تختار Control Center أو مركز التحكم و تختار تخصيص Customize و تضيف أيقونة السمع Hearing و بعدين توصل أى Puds أو سماعات لاسلكية موجودة عندك بالموبايل بتاعك و لو شغلت الميزة ديه وانتا موصل السماعة هتقدر تسمع أى صوت قريب من موبايلك حتى لو انتا بعيد عنه و هيكون على موبايلك علامة ميكروفون معناها ان الميزة ديه شغالة 

الميزة السادسة ديه بالذات ميزة مهمة لكل اللى بيستخدموا الموبايل و معندهمش تحكم فى الوقت و ممكن يضيعوا اليوم كله فى تطبيقات السوشيال ميديا و ممكن مثلا تضيع 8 ساعات فى تطبيقات ملهاش لزمة 
و الميزة ديه هتفيدك فى انك ممكن تحط لنفسك Limit للتطبيقات ديه وتخلى الموبايل مثلا يديك ساعة واحدة لتطبيقات السوشيال ميديا فى اليوم و ممكن طبعا تغير الوقت المحدد ده على حسب احتياجك و لو عديت الوقت ده بيقولك انك عديت الفترة المسموح بيها لأستخدام التطبيق ده و مفيش قدامك غير انك تستنى لتانى يوم أو انك تختار انه يفتحلك التطبيق ده لمدة 15 دقيقة بس و ده لو محتاجه ضرورى و الميزة ديه بتفعلها عن طريق انك تدخل على الاعدادت و بعدين Screen time و بعدها App Limits و تعملها تفعيل و بعدين تدوس Add Limit وتختار التطبيق اللى يعجبك 
الميزة ديه بصراحة مهمة جدا وهتنظملك وقتك جدا وخصوصا لو عندك مذاكرة و امتحانات و مضيع وقتك على الفيس 

الميزة السابعة و الأخيرة فهي ميزة موجودة فى الأيفون من سنين كتيرة بس فيه ناس كتير متعرفهاش بس هيا ميزة بسيطة جدا و مفيدة فى ان لو في أى تطبيق انتا فاتحه مثلا المعرض و فضلت تعمل Scroll Down كتير جدا أو نزلت لتحت كتير و عايز ترجع تانى لفوق بدل ما تفضل ترجع بصباعك تانى و تاخد وقت هتدوس بس لمسة على أيقونة الساعة من فوق فهيطلعك تانى لفوق بكل سهولة من أول الصفحة و طبعا ديه مفيدة جدا فى كل التطبيقات 

ديه كانت كل المميزات اللى أكيد هتفيدك في أيفون لو متعرفهاش أكيد هتعجبك جدا و لو تعرفها استنى مننا مميزات تانية مكنتش تعرفها فى أى حاجة تخص التكنولوجيا 

Samsung S10+ VS OnePlus 7 Pro مقارنة العمالقة


من الحاجات اللى بتلفت نظرنا لما بنحب نتفرج على موبايل هو أداء الكاميرا بتاعته و اللى بصراحة شركة OnePlus مكانتش مهمتة بحاجة زى كده وكان كل همها انها تديك موبايل قوى جدا و كاميرا معقولة تقضى الغرض و لكن بداية من OnePlus 6T الأمر ده بدأ يختلف كليا و طبعا معا تطور الموبايل و ظهور OnePlus 7 Pro اللى يعتبر موبايل خيالى بمعنى الكلمة لقينا ان ديه فرصة كويسة علشان نقارنوا بأجمد موبايلات سامسونج +Galaxy S10 

فى المجمل ما ينفعش انك تقول حكم تام ان كاميرا موبايل أفضل من كاميرا موبايل تانى و الصح انك لازم تقارن الكاميرات فى كل الأوضاع التصوير الثابت و التصوير الفيديو و أداء ال HDR و أداء الصوت بتاع تسجيل الفيديو و كمان أنواع الكاميرات ال Wide, Telephoto و العزل اللى بتعمله الكاميرات فبصراحة فى أمور كتير أوى بتخلى الواحد يفكر هل الكاميرا ديه أفضل ولا الكاميرا ديه 

علشان كده مفيش داعى للتعصب و اننا نقول كاميرا موبايل هى الأفضل من التانية لأن كل كاميرا بتكون مفضلة بالنسبة لاستخدام الشخص و بالنسبة لأحتياجاته و بالنسبه لامكانياته برضه 
فى ملحوظة مهمة فى تصوير الفيديو و هيا انك تقدر فى ال +S10 تقدر تنتقل للعدسة ال UltraWide بينما فى OnePlus 7 Pro ما ينغعش انما تقدر تنتقل للعدسة ال Telephoto و طبعا الفرق ان فى الون بلس 3x Zoom و فى السامسونج 2x Zoom بس 

بصراحة الموبايلين بيقدموا أداء كاميرات ممتاز جدا ولكن طبعا فيه أفضلية بسيطة لسامسونج مقارنة بال ون بلس وده هيبان فى تصور الفيديو خصوصا لما تعمل زووم هتلاقى ان التفاصيل بتختفى شوية فى ون بلس و كمان فى التصوير الفيديو بالكاميرا الأمامية هنلاقى ان سامسونج بيدى ثبات أكتر معا توازن ألوان جميل جدا و ممكن نقول نفس الكلام على ون بلس و لكن بدرجة أقل 

كمان فى التصوير فى النهار هنلاقى الموبايلين ممتازين جدا و ممكن تصور فيديو بجودة عالية بأى موبايل و مش هتحس بفرق ممكن الاختلاف البسيط ان ون بلس هتلاقى فيه الألوان أفتح شوية و فاقعة الى حد ما عكس الألوان اللى بتكون أهدى فى سامسونج معا تشبع ممتاز جدا 
بالنسبة لصوت المايك هنلاقى ان ون بلس صوته أعلى على عكس سامسونج اللى فى الفيديو بيبقى الوصت أوطى و لكن بيبقىفى نقاء صوت فى سامسونج أفضل بكتير من ون بلس و كمان فى عزل للضوضاء أحسن 

و الصور العادية هنلاقى ان مفيش اختلاف كبير بين الموبايلين فى الكاميرا الأساسية و ممكن نقول ان نقول ان نقطة التفوق هنا لصالح OnePlus اللى صوره بتكون كويسة جدا معا ألوان ممتازة ومفيهاش الفقعان اللى كان موجود فى الفيديو أو الكاميرا الأمامية و رغم ان التفاصيل فى سامسونج هتكون واضحة أكتر لكن فى بهتان صغير ممكن ما يكونش حلو بالنسبة لبعض الناس 

و فى الكاميرا ال UltraWide الموضوع اختلف تماما و الصور فى +S10 أقل ما يقال عنها انها خرافية و ده لأن الألوان ممتازة جدا و متشبعة بدرجة مظبوطة و توازن الألوان رهيب و كمان التفاصيل كتيرة و مفيش أى Noise فى الصورة عكس OnePlus اللى ممكن يكون الوضع ده مش أفضل وضع فيه لأنه رغم انه كويس جدا الا انه ما يتقارنش بسامسونج

فى الصور الزووم 2x هنلاقى ان مفيش اختلاف بين الكامرتين و كل موبايل فيه ميزة يعنى ممكن سامسونج توازن الألوان أحسن فيه و كمان فيه نقاء أكتر أما ون بلس الصور فيه واقعية أكتر و الألوان أفتح 
و فى التصوير السيلفى هنلاقى ان الصور ممتازة جدا فى ون بلس و ممكن من أحسن الصور السيلفى اللى هتاخدها بألوان فاتحة و تفاصيل ممتازة بس بصراحة مش هتكون أفضل من صور سامسونج اللى جودتها بتكون عالية بصورة مش طبيعية و هتشوف تفاصيل رهيبة فى الصورة و الصور ممكن ما تكونش واقعية زى ون بلس لكن هتلاقى انها أحلى بكتير 
و فى البورتريه بصراحة الموبايلين العزل فيهم ممتاز جدا و مفيش اختلاف ما بينهم فى الوضع ده لأنك ببساطة هتاخد أحسن بورتريه ممكن تتخيله 

بالنسبة للتصوير بالليل و اللى يعتبر ده الحاجة اللى الشركات بتتسابق فيها علشان توفر أفضل جودة ممكنة فى الضوء القليل 
هنلاقى ان الموبايلين ممتازين جدا و يمكن المميز هنا ان ون بلس أفتح شوية من سامسونج و اللى يعتبر مفيد أكتر فى الضوء القليل 
و الألوان مظبوطة جدا فى الموبايلين ومفيش Noise خالص و هتلاقى التفاصيل كتير و واضحة و ديه حاجة ممتازة جدا لأن أغلب الكاميرات كانت بتدى أداء ممتاز فى النهار و بالليل منلاقيش ربع الأداء ده 

خلاصة الكلام ان OnePlus هيقدملك أفضل كاميرا ممكنة بتفاصيل ممتازة فى كل الأوضاع و منقدرش نقول خالص ان الكاميرا فيه وحشة و لكن سامسونج ممكن يتفوق عليه فى بعض الأوضاع اللى برغم واقعية صور ون بلس الا ان سامسونج بيقدم جودة خيالية جدا 
و على حسب الأوضاع اللى بتفضل التصوير بيها هتحدد انهو اللى يناسبك أكتر و لكن مفيش حكم كامل ان موبايل أفضل من التانى لأن الاتنين ممتازين 

IPhone مميزات مخفية فى موبايلات


شركة Apple من الشركات اللى تحس انها مبتوصلكش الميزة بشكل مباشر فى أوقات كتير تكون عندك الميزة موجودة فى الأيفون فى أيدك لكن انتا ما تعرفش انها موجودة وعلشان كده حبينا نوضحلكم المميزات المخفية فى هواتف أبل 
طبعا ممكن تكون عارف مميزات من اللى هنتكلم عنها و ممكن لأ بس أكيد مش كل المستخدمين على دراية بالمميزات ديه 

كل المميزات ديه متجربة على موبايل Iphone Xmax بس ده ما يمنعش انها تكون شغالة على الأيفونات الأقدم بشكل عادى جدا 
و المميزات ديه فى منها المتفعل بشكل تلقائى يعنى مش محتاج عملية تفعيل منك و فى منها اللى هيحتاج عملية تفعيل من خلال الاعدادات بتاعة الأيفون 

و أول ميزة هيا ميزة تصغير الشاشة اللى رغم انها موجودة فى الأيفون بقالها فترة مش قليلة بس فى نفس الوقت فى ناس كتير جدا متعرفهاش 
و تصغير الشاشة بيتم من خلال انك تسحب شريط التنقل لتحت و طبعا الميزة ديه بتخلى استخدام الموبايل بأيد واحدة أسهل بكتير جدا و خاصة لو مش قادر توصل بأيدك للأجزاء اللى فى الشاشة من فوق و هيا متوفر فى موبايلات الأيفون الأقدم من أيفون 10 عادى و بتكون من خلال لمس البصمة مرتين

أما الميزة التانية هيا عبارة عن امكانية تجميع تطبيقات كتير معا بعض و تحريكها كمجموعة واحدة وديه هتوفر عليك وقت كتير لو انتا من الناس اللى بتحب ترتب أيقوناتها على الموبايل كل فترة و الميزة ديه بتشتغل من خلال انك تفضل دايس على الأيقونة لغاية ما تبقى عايمة و بعدها اسحبها لأى مكان فاضى و اضغط بصباع تانى على أى تطبيق عايز تضمه للمجموعة اللى هتحركها و بالطريقة ديه هتقدر تنفل التطبيقات اللى انتا عايزها فى أى مكان بسهولة 

الميزة اللى بعدها هيا ميزة خاصة بمتصفح Safari الخاص بأجهزة أبل وهيا ان فى مكان فى المتصفح لو لمسته هتقدر انك تقفل كل ال Tabs اللى انتا فاتحها مرة واحدة وكمان لو عملت Scroll للتابات المفتوحة هتلاقى فوق فيه مربع للسيرش تقدر فيه تبحث عن أى حاجة انتا فاتحها و الميزة ديه مهمة جدا لو بتفتح حاجات كتير

الميزة الرابعة هيا انك تعمل اختصار و ده ببساطة بانك تضغط على زرار الباور 3 مرات و هيقلل ضوء الشاشة جدا حتى لو انتا مقلل ضوء الشاشة على أقل حاجة ممكنة و استخدمت الميزة ديه برضه هيقلل ضوء الشاشة لأقل من المستوى ده لأنه ببساطة ملوش علاقة بالشريط بتاع الاضاءة اللى بيبقى موجود أصلا فى مركز التحكم و الميزة ديه كويسة جدا فى توفير الطاقة وكمان لو انتا مبتحبش الاضاءة العالية 

الميزة الخامسة بتفتحلك كاميرا Zoom بس الزوم الموجود فى الكاميرا ديه بيكون ضعف اللى انتا بتاخده فى الزوم العادى بتاع تطبيق الكاميرا الخاص بأيفون و الميزة ديه ببساطة ممكن تضيفها لمركز التحكم و تفعلها بكل سهولة وقت ما تحتاج

أما الميزة السادسة فديه لذيذة و هستمتع بيها جدا و انتا بتجربها و ديه ليها علاقة بال Imessage
طبعا انتا عندك فى الأيفون X و XR و كل الأيفونات الحديثة يعنى عندك ميزة ال Animoji اللى من خلالها تقدر تكون شخصية شبهك على قد ما تقدر و بعدين تتحكم فيها من خلال ال Face Id الموجود فى الموبايل و الميزة انك تقدر تخلى الأنيموجى ده زى React على أى message حد بيبعتهالك يعنى ببساطة انتا عندك تطبيق الماسنجر العادى انتا تقدر تعمل React على أى رسالة حد بيبعتهالك بس الري أكتات ديه بتكون محدودة 5 تقريبا و طبعا ملهومش علاقة بوشك يعنى عكس الميزة ديه اللى بتخلى أى ريأكشن تقدر تعمله بوشك و تقدر تنقله و نخليه ريأكت وتاخده تحطه على أى Message حد بيبعتهالك 
و الموضوع مسلى الحقيقة وكمان على حسب تعبيرات وشك 

دول كانوا أول 6 مميزات موجودين فى أيفون و اللى أكيد هيفدوك سواء كنت تعرفهم أو لأ 
لكن كمان فيه مميزات تانية هنتكلم برضه عنها بالتفصيل و أكيد ما كنتش تعرفهم من هنا 

IOS 13 أخيرا أبل تعلن عن


انتهى مؤتمر Apple للمطورين لسنة 2019 و تم الاعلان فيه عن حاجات كتير جدا بس أهمهم نظام التشغيل الجديد IOS 13 
و فى البداية لازم نقول معلومة مهمة و هيا ان IOS 13 هيكون متوفر على موبايل IPhone 6s فيما أحدث و ده معناه ان أيفون 6 و كل اللى قبله مش هيتوفر عليهم IOS 13 بشكل رسمى 
و التحديث الخاص بالنسخة النهائية هيبدأ يوصل للمستخدمين كالعادة فى شهر 9 بعد الاعلانات عن الأيفونات الجديدة 

خلينا نتكلم عن أهم 10 مميزات فى IOS 13 للى تم الاعلان عنها 
الميزة الأولى ان سرعة فتح التطبيقات بقت أكبر بمرتين عن الاصدار اللى فات 
و الميزة التانية ان ال Face ID أو مستشعر بصمة الوجه بقا أسرع ب 30%
أما الميزة التالتة هيا ان حجم التطبيقات بقا أقل بنسبة 50%
و الميزة الرابعة ان تم تقليل حجم التحديثات بنسبة 60% 
و الأربع مميزات دول كانوا كلهم متعلقين بالأداء و التسريع  عكس الميزات اللى هنقولها 

الميزة الخامسة و اللى تعتبر من أكتر الميزات اللى الناس كانت متحمسة ليها ومستنياها و هيا ميزة الوضع الليلى Dark Mode و هنا الوضع الليلى بيشمل كل قوائم الجهاز الرئيسية زى الاعدادات و مركز التحكم و حتى شاشة القفل 
طبعا كل التطبيقات الخاصة ب أبل زى تطبيق الاتصال والرسايل و الأخبار و غيرهم من تطبيقات أبل الكتير اللى بتيجى مثبتة بشكل افتراضى على الأجهزة
و فيه نقطة مميزة فى الوضع الليلى و هيا امكانية تفعيل الوضع الليلى بشكل تلقائى يوميا وقت الغروب يعنى لو الميزة ديه متفعلة هتلاقى ان الوضع بيشتغل لوحده كل يوم وقت الغروب

الميزة السادسة ان أبل أضافت امكانية تسجيل الدخول للتطبيقات بواسطة حساب أبل وده معناه انك لو نزلت تطبيق و التطبيق ده طلب منك تسجيل الدخول يبقى غالبا قدامك حل من اتنين يا اما تستخدم فيسبوك فى تسجيل الدخول يا تستخدم جوجل فى تسجيل الدخول لكن دلوقتى بقا عندك زيادة عليهم حساب أبل 
و هنا أبل بتقول انها تضمنلك الحفاظ على معلوماتك الشخصية بشكل أفضل من خلال تسجيل الدخول بحساباتها و ده لأنها هتمنع التطبيقات دى من انها تاخد معلوماتك الشخصية و أبل بتقول ان هيكون عندك الامكانية انك تدى التطبيقات ديه أيميل وهمى فى كل مرة هتسجل فيها الدخول على تطبيق منهم و كده هتحمى بيانتك الشخصية بشكل كامل بما فيهم الأيميل بتاعك

و الميزة السابعة هيا تحسينات على طريقة عرض الصور فى تطبيق الصور من خلال الذكاء الاصطناعى لكن الأهم ان أبل أضافت امكانية تعديل الصور بشكل احترافى أكتر جوه تطبيق الصور نفسه يعنى من خلال تطبيق الصور تقدر تعدل الاضاءة مثلا و التشبع و الألوان و التباين و غيرهم و كمان تقدر تضيف الفلاتر اللى انتا محتاجها و أكيد ده هيكون مناسب للناس اللى مبتستخدمش تطبيقات تعديل احترافية 
و المهم كمان ان بقى فيه طريقة لتعديل الفيديو بنفس الشكل و هتقدر تعدل على الفيديو و تضيف فاتر ده غير انك تقدر تعمل تدوير للفيديو 

و نيجى بقا لأخر 3 مميزات وهما مش حاجات جديدة اطلاقا بس فى عالم IOS هما حاجات جديدة و تهم المستخدمين 
الميزة رقم 8 ان شريط الصوت اللى كان بيظهر فى نص الشاشة و بيخفى المحتوى دلوقتى و أخيرا بقا بيظهر على الجنب جنب زرار تعلية وتوطية الصوت 
و جه معناه ان المحتوى بتاعك مش هيضيع منه جزء لو قررت تعلى أو توطى الصوت 

الميزة رقم 9 ان برضه أخيرا تقدر تختار شبكة الواى فاى من خلال مركز التحكم نفسه من غير ما تروح تدخل على الاعدادات و نفس الكلام ده ينطبق على البلوتوث
و الميزة رقم 10 و الأخيرة انك بقيت تقدر تعمل Share للصوت من خلال البلوتوث و لسماعتين مختلفين يعنى ببساطة ممكن يكون صاحبك مشغل أغنية أو فيلم و الصوت يشتغل على ال Air Puds بتاعتك و بتاعته 

Tecno Spark 3 Pro مواصفات وسعر


أصعب حاجة الرجوع بعد فترة خمول طويلة و الكلام هنا على شركة تيكنو اللى بقالها فترة طويلة مختفية وكان ليها مركز متقدم فى السوق المصرى ولكن بدأت انها تتراجع ودلوقتى بدأت تحاول ترجع تانى بقوة شوية فى الفئة الاقتصادية و اللى بنسميها عصب السوق المصرى 
شركة Tecno أصدرت موبايلين أقل من 2000 جنيه و هما Tecno Spark 3 و Tekno Spark 3 Pro

خلينا نتكلم عن النسخة ال Pro 
بالنسبة للتصميم فهوا بصراحة تصميم عادى يعنى تيكنو محاولتش انها تبتكر فيه أى شيئ جديد و اللون حتى موجود فى موبايلات من شركات تانية نفس موضوع اللونين الفاتح من تحت و من فوق أغمق يعنى مفيش حاجة هتشدك وتخليك تتكلم على التصميم
لكن فى الفئة الاقتصادية تعتبر حاجة مقبولة انك تلاقى تصميمات متشابهة

أما بالنسبة للشاشة فهنتكلم فيها على جزئيتين الجزئية الأولى هيا الشكل و اللى بالنوتش ممن الناس تتقبله وممكن ناس تانية لأ و فى الفئة ديه شوفنا موبايلات فيها ال WaterDrop Notch فبصراحة وجود نوتش بالحجم  ده فى منتصف 2019 فى وقت ما بنشوف شاشات جديدة بالحجم الكامل يعتبر اختيار مش موفق 
و الجزئية التانية هيا الأداء بتاع الشاشة و اللى نقدر نقول عليه كويس 
الشاشة 6.2 انش بدقة 1500x720 بيكسل و كثافة 269 بيكسل لكل انش و طبعا من نوع IPS و بصراحة الأداء بتاع الشاشة ممتاز جدا ما عدا بس موضوع النوتش الكبير ده بس لما تبدأ تستخدم الموبايل هتتعود عليه 

السماعة الخارجية الأداء بتاعها بسيط و متواضع الصوت بتاعها مش عالى و فى نفس الوقت وجودها ناحية الشمال يعتبروا نقاط سلبية فى السماعات الخارجية بتاعة الموبايل و لكن يظل ان احنا بنقول انها فى الفئة الاقتصادية فممكن نعتبر ان أدائها مقبول الى حد ما 
الموبايلفيه مستشعر بصمة و الأداء بتاعه ممتاز و بيشتغل كويس جدا وبدقة ومفيهوش أى مشكلة و كمان فيه Face Unlock

أما بالنسبة لأداء الموبايل فهوا بييجى بمعالج من ميدياتيك Helio A22 و ده المعالج اللى بيبقى موجود فى الفئة الاقتصادية القليلة و بيكون بتكنولوجيا 12 نانوميتر 
الذاكرة الداخلية فى الموبايل بتكون 32 جيجا بايت معا 2 جيجا بايت رام
 المميز فى الأداء ما بيكونش دايما المعالج فى الفئة الاقتصادية و لكن بيكون فى تحسين السوفت وير أو الواجهة بتاعة المستخدم علشان تقدر تديك أداء أفضل معا معالج متواضع 
السوفت وير الموجود هنا Android 9.0 بواجهة HIOS 4.6 و هيا واجهة محسنة اتعدلت كتير عن الأول 

ولكن برضه مش هيا ديه نقطة التفوق اللى فى الموبايل ده و لكنه بيتفوق فى انه بيتميز بحاجة يمكن مش موجودة فى موبايلات أغلى منه و هيا ان شركة جوجل ذكرت أن تيكنو هتكون من أوائل الشركات اللى هتختبر نسخة Android 10 الجديدة يعنى برغم ان التيلفون ده رخيص جدا الا انه هيكون من أوائل الموبايلات اللى هينزل عليه نسخة أندرويد 10 خام 
أما بقا النقطة اللى مثيرة للجدل فى غالبية موبايلات تيكنو هيا انها دايما لما بتيجى تعمل اعلانات بتعمل اعلانات عن الكاميرات 

نتكلم بقا عن تفاصيل الكاميرا الخلفية و اللى بتنيجى بكاميرا رئيسية بدقة 13 ميجا بيكسل بفتحة عدسة F1.85 و بتصور فيديو لحد دقة 1080p و الكاميرا التانية الخاصة بعزل الخلفية 2 ميجا بيكسل بفتحة عدسة F2.8 
فى وضعيات كتير أوى فى البرنامج بتاع الكاميرا و لكن هما ركزوا على وضعية البوكيه 
أما بالنسبة للكاميرا الأمامية فهيا بدقة 8 ميجا بيكسل و فتحة عدسة F2.0 و بتصور فيديو لحد دقة 1080p و أدائها كويس فى الفئة بتاعتها 

أخيرا البطارية بتاعة الموبايل السعة بتاعتها 3500 ميللى أمبير و مدخل الشاحن بتاعها Micro USB كالمعتاد فى الفئة ديه و للأسف مبتدعمش الشحن السريع 
سعر الموبايل 1900 جنيه 


طريقة تشغيل لعبة ببجى على الكومبيوتر Pubg PC


تعريف باللعبة 
لعبة ببجى بقت من أكتر الألعاب المشهورة فى الوطن العربى و فى العالم و ده لأنها من أمتع ألعاب الباتل رويال و هوا نوع جديد من الألعاب بيعتمد على ال Survival أو البقاء لأخر الجيم علشان تكسب وده بيتضح من اسم اللعبة Player Unkown's Battle Ground و كلمة Pubg مجرد اختصار للأسم ده 
اللعبة بتعتمد على انك بتنزل من الطيارة من غير أسلحة وبتحاول تجمع أسلحة كويسة وذخيرة علشان تقدر تكمل فى اللعبة و تقتل أى حد يواجهك بس فيها مشكلتين ان معا مرور الوقت بتقل المنطقة المسموح باللعب فيها ال Zone ولو بقيت بره ال Zone دمك هينقص و المشكلة التانية انك لو مت مش هتقدر تصحى تانى وهتبقى خسرت الجيم 

المشكلة اللى بتواجه كتير مننا ان اللعبة بتحتاج مساحة كبيرة و امكانيات على الموبايل علشان تقدر تشغلها وتلعبها من غير تهنيج و مفيش حل غير انك تمسح حاجات علشان تنزلها أو تغير موبايلك لو مش بيشغلها  
بس الحل الأسهل انك تحملها على الكومبيوتر و هتقدر تلعبها بسهولة أكتر كمان لأن التحكم فى الماوس أفضل بكتير من الموبايل و كمان الكيبورد هيخليك تقدر تتحرك أسرع  

بس لأن اللعبة بتنزل على Android و IOS و مش لل Platform بتاع الكومبيوتر يبقى لازم تستخدم محاكى علشان تقدر تحمل اللعبة و تشغلها من عليه 
فكرة المحاكى انه برنامج بيقدر ينزل تطبيقات الموبايل على الكومبيوتر و بيخليك تتعامل معاه زى الأندرويد و تحمل التطبيقات عن طريق Play Store أو عن طريق اختيار التطبيق اللى حابب تحمله من التطبيقات الموجودة فى المحاكى و من أشهر ال Emulators الموجودة Nox و Bluestaks و Tencent Gaming  و تينسينت هوا اللى هنستخدمه فى تحميل اللعبة 

خطوات التحميل 
أول خطوة تدخل على الموقع الرسمى للمحاكى من هنا 
و بعدين تختار Download 
تانى خطوة انك تسطب البرنامج بعد ما يتحمل و تمشى معا الخطوات 
تالت حاجة هتعمل Download للعبة Pubg و تختار مكان التحميل و يفضل يكون مكان فيه مساحة فاضية أكبر من 7 جيجا بايت
بعد ما تسيب اللعبة تتحمل هتلاقى أيقونة ليها على سطح المكتب هتشغلها و تسيبها لو فى أى حاجة عايزة تتحمل و بعديها هتلاقى اللعبة فتحت 
علشان تقدر تلعب معا أصحابك على فيس بوك هتلاقى قدامك علامة فيسبوك اختارها وسجل دخول بالأكونت بتاعك ونفس الكلام لو تويتر و أخر حاجة انك ممن تسجل دخول Guest من غير أى أكونت 

اللعبة هتلاقى فيها اختلاف كبير عن الموبايل و هتحس انك بتلعب أحسن و الشاشة طبعا هتكون أكبر من الموبايل و علشان تلعب معا أصحابك اللى بيستخدموا الموبايل لازم الأول تضيفهم جوه اللعبة و بعدها ابعتلهم طلب وهتدخل معاهم من غير أى مشكلة ومش شرط يكونوا بيستخدموا محاكى 
بس طالما فى حد فى الفريق بيستخدم محاكى يبقى الجيم اللى هتدخلوه هيكون فى سيرفر PC مش موبايل يعنى كل اللى قدامك هيكونوا بيلعبوا بمحاكى برضه 
أخر حاجة بقا هيا متطلبات اللعبة و اللى مش بتكون عالية أهم حاجة تكون الرامات اكتر من 3 جيجا بايت و كارت الشاشة يكون متوسط و بس هتشتغل معاك كويس جدا 


Mac Pro 2019 أبل تعلن عن أقوى كومبيوتر فى التاريخ بسعر فلكى

ال Mac Pro الجديد اللى شركة Apple أعلنت عنه فى مؤتمر WWDC يعتبر أكبر تطور فى عالم الكومبيوترات من سنين 
و بالنسبة لتاريخ ال Pro Market معا أبل و أخر كومبيوتر من أبل ينفع انك تغير فى مكوناته الداخلية وتعمله Upgrade براحتك زى ال PC كان من حوالى 10 سنين و خلال السنين ديه كلها أبل مكانتش معبرة احتياجات الناس ال Professionals و مفيش فى ال Line Up بتاع الماكات أى حاجة مناسبة ليهم سواء ال Macbook أو IMac أو اى حاجة زى كده

 و فى 2013 جت أبل و نزلت كومبيوتر جديد اسمه Mac Pro برضه بس مكانش قابل للتحديث و التطوير أوى علشان كده ناس كتير سابت الماك و اتجهت انها تبنى ال PC 
و لكن الحقيقة ان نظام ال Mac أفضل لل Creatives و ال Professionals و ده علشان مطورين البرامج الكبيرة المهمة بتاعة الشغل ديه بيفضلوا انهم يطوروا على هاردوير أبل عن الأجهزة التانية وده طبعا فى شغل الصوت و الجرافيك والمونتاج و غيرهم 

أبل بصراحة ما خذلتناش وأصدرت أخيرا ال Mac Pro 2019 اللى بيعيد أمجاد أبل و بيقدملنا تصميم ال PC العادى بالكيسة اللى ممكن تفكها عادى جدا 
و تصميم المكونات كله مبنى على أساس الحوامل الاستانليستيل و الكوفر الخارجى هو مجرد غطاء بس لمكونات الجهاز وفيه فتحات تهوية فى كل مكان و شكله بصراحة فخامة بمعنى الكلمة 

نسيبنا بقا من الشكل و التصميم و نروح لمواصفات الشيئ ده اللى تعتبر مدمرة و كلها مكونات معمولة خصيصا لشغل سنين و سنين و ساعات طويلة بدون توقف
عندك معالج Intel Xeon بيبتدى من 8 Cores و بيوصل لغاية 28Core Processor و 12 مكان للرامات تخليك تحط لغاية 1.5 تيرا بايت رامات اللى هوا أساسا رقم محدش عمره تخيل انه يكون عنده حتى فى الأحلام 
و كمان فيه 8 أماكن كمان علشان كروت الشاشة
و فى حاجة عاملينها جميلة أوى اسمها NBX Module و هيا عبارة عن Chip فيها كارتين شاشة كل كارت منهم اسمه AMD Vega II بيديك لغاية 14 TeraFlops جرافيك باور يعنى الكارتين معا بعض هيوصلوا ل 28 تيرافلوبس جرافيك باور 

و الرهيب جدا انك ممكن تحط 2 NBX مش واحدة بس يعنى هتاخد 56 تيرا فلوبس جرافيك باور معا فيديو رام 128 جيجا بايت وده بصراحة افتراء 
و على فكرة أقوى كارت شاشة حالى من نفيديا مثلا ال RTX 2080 TI تقريبا هيقدملك 15 تيرافلوبس و يمكن أكتر أو أقل شوية بس معا الماك برو بقا هتاخد 56 تيرافلوبس 

تأثير ده بقى على نماذج الشغل فى أرض الواقع زى المونتاج مثلا هنلاقى ان الماك برو فيه حاجة اسمها Apple AfterBurner و ديه Chip مخصوصة ل Decoding الفيديو و أى كومبيوتر دلوقتى فى الدنيا فى العصر الحديث فيه حاجة اسمها Hardware Accelrated Video Decoder و ديه وظيفتها انها تاخد الكوداك بتاع الفيديوهات بتاع الكاميرات و تحطم فيه أو تكونه علشان تنشر الفيديوهات فى مكان تانى و الموضوع ده موجود فى أى كومبيوتر 
بس عا الماك برو و ال Apple AfterBurner هتقدر تشغل 3 فيديوهات 8K Raw مش مترندرين  تعملهم Stream مباشرة فى نفس الوقت ولو مش بتصور 8K و بتصور 4K تقدر تستريم 12 فيديو 4K Raw فى نفس الوقت 

و ديه طبعا أرقام غريبة جدا ومش مصدقينها لكن أكيد اللى واخدين بالنا منه ان الجهاز ده مش موجه للمستخدمين العاديين ده مجه للبروفيشنالز و الناس اللى بتعمل أفلام مثلا و طبعا لأن ده مش كومبيوتر لأى حد لأن سعره غالى جدا ومفيش حد هيقدر يجيبه بسهولة و كمان ش أى حد هيستفاد بالامكانيات ديه و المشكلة الأكبر ان أقل نسخة منه ب 6000 دولار و ديه النسخة المبدئية اللى تعتبر قريبة من الكومبيوتر العادى و علشان توصل لأعلى حاجة فى الرامات و كروت الشاشة و أعلى نسخة منه ممكن توصل ل 40000 دولار و ده رقم مهول جدا تقريبا بيعادل 650 ألف جنيه و ممكن تشتري عربية بالسعر ده وعربية جامدة كمان مش عربية عادية 


Huawei Y9 Prime 2019 تجربة الاستخدام الكاملة ومميزات وعيوب


خلاصة استخدام الموبايل القوى جدا 
ال Huawei Y9 Prime 2019 وده طبعا موبايل مختلف تماما عن ال Y9 2019 اللى كان نزل من حوالى 6 شهور تقريبا ولكن اللى هنتكلم عنه هوا التحديث بتاع ال Y9 
هنتكلم عن المميزات و العيوب للموبايل معا تجربة الاستخدام علشان تعرف هل فعلا يستاهل انك تشتريه ولا لأ 

خلينا نبدأ بالمميزات اللى فيه لأن الموبايل ده مميزاته كتير جدا و أول ميزة هنلاقيها فيه هيا الشاشة الكاملة اللى هيا من غير ولا نوتش ولا خرم ولا أى حاجة و هتكون كاملة مفيهاش أى حاجة تعوق المنظر بتاعها و الحواف هنا صغيرة جدا مفيش بس غير الحافة اللى تحت و اللى هيا برضه بتيجى صغيرة ولكن مش زى الحافة اللى فوق واللى تعتبر شبه معدومة

طبعا علشان تحقق الشاشة الكاملة ديه بنسبة استحواذ كبيرة للشاشة هنلاقى ان الشركة قررت تخلى الكاميرا الأمامية عبارة عن Motorized Pop-Up Camera زى ما شوفنا في موبايلات كتير زى ال Oppo F11 Pro ولكن اللى ما شوفناهوش قبل كده هوا موبايل ب 4500 جنيه و فيه شاشة كاملة عن طريق ميزة ال Pop-Up الرهيبة جدا
و اللى كمان على الرغم من ناس كتير ممكن يخافوا من وجود حاجة زى كده فى الموبايل الا انها تعتبر أمنة جدا وده بسبب الموتور اللى بمجرد ما الموبايل يقع منك والكاميرا مفتوحة هتلاقى ان الموتور قفل الجزء الخاص بالكاميرا بسرعة قبل ما تصتدم بالأرض وده اللى هيحمى موبايلك بصورة كبيرة 

كمان بالنسبة للشاشة هنا فهي بتيجى بحجم 6.6 انش بدقة +Full HD و اللى الحقيقة هيا شاشة ممتازة جدا رغم انها IPS مش أموليد و كمان سطوعها كويس جدا تحت ضوء الشمس و هتديك تجربة مشاهدة ممتازة جدا و ده بسبب انها حوافها صغيرة جدا وهتقدر تستخدم الشاشة كلها فى المشاهدة وكمان لو حبيت تجرب ألعاب هتلاقى ان تجربة الألعاب خرافية وهتحس انك داخل جوه اللعبة وده واحدة من أهم مميزات الشاشة الكاملة

كمان من ميزات الموبايل الذاكرة الداخلية اللى هتكون 128 جيجا بايت معا 4 جيجا بايت رام و اللى طبعا نادرا لما بنشوف الأرقام ديه فى الفئة السعرية ال 4500 جنيه 
وكمان المعالج بيكون Kirin 710 اللى شوفناه تقريبا فى أغلبية أجهزة هواوى و هونر وعارفين قد ايه المعالج ده ممتاز وقوى جدا رغم ان بعض الناس ممكن تكون زهقت من المعالج ده و بتطالب هواوى انها تغيره وتحط معالج أحدث و لكن من وجهة نظرنا المعالج ده قوى جدا و بيديك أداء كويس جدا بالنسبة للمنافسين وهنلاقى انه بينافس ال Snapdragon 660 و أعلى كمان من Helio P70 بتاع Oppo F11 Pro  

و فعلا معا استخدام الموبايل هنلاقى ان المعالج ده بيديك أداء كويس جدا و مش هتلاقى أى مشاكل وانتا بتتصفح النت أو بتفتح تطبيقات السوشيال ميديا و كمان فى الألعاب هتلاقى انه بيديك تجربة ألعاب ممتازة وكمثال ممكن نتكلم عن لعبة Pubg اللى المعالج قدر يشغلها على أعلى اعدادات للجرافيكس من غير أى مشاكل 
و بصراحة رغم ان الناس متحاملة شوية على المعالج لأنه اتكرر فى موبايلات كتير الا اننا شايفينه كويس جدا طالما بيديك الأداء المطلوب فى الألعاب وكمان بيكون سريع جدا بشكل عام ومفيهوش أى مشاكل يبقى مش لازم الشركة تغيره

ومن أهم مميزات الموبايل هيا ال 3 كاميرات الخلفية و اللى ممكن ما بقيتش ميزة فى الفئة السعرية ديه ولكنها حاجة كويسة جدا 
و أول واحدة فى الكاميرات بتيجى بدقة 16ميجا بيكسل بفتحة عدسة F1.8 
و التانية بتكون بدقة 8 ميجا بيكسل Wide Angle 
و التالتة بتيجى بدقة 2 ميجا بيكسل وبتكون لخاصية العزل أو Depth OF Field
و الكاميرات هنا الى حد ما كويسة فى ضوء النهار و هتديك تفاصيل كتير فى الصورة الصبح و العزل بتاعها بيتم بشكل مظبوط جدا و مش هتلاقى فيه أى مشكلة و الكاميرا ال Wide كويسة جدا كزوايا تصوير ولكن الجودة بتاعتها هنتكلم عليها فى العيوب 
الكاميرا الأمامية هنا بتيجى بدقة 16 ميجا بيكسل و هتديك تفاصيل كتير جدا و هتكون ممتازة فى الصبح ولكن ممكنيكون ليها شوية عيوب هنتكلم عنها

كمان وجود منفذ الشحن USB Type C يعتبر من مميزات الموبايل نظرا لقلة وجودها فى موبايلات هواوى فى الفئة السعرية ديه و لكن للأسف الجهاز ما بيجيش معاه فى العلبة شاحن سريع و هنلاقى انه بيدعم الشحن السريع بقدرة 18W ولكن مفيش شاحن سريع معاه 
و الكويس جدا فيه ان البطارية هتكون بسعة 4000 ميللى أمبير واللى تعتبر سعة رهيبة و الموبايل ممكن يشتغل 8 ساعات من وقت عمل الشاشة و ده رقم ممتاز جدا بالنسبة لجهاز زى ده 

نروح بقا للعيوب اللى ممكن نلاقيها فى الموبايل ده و أولها الشاشة رغم انها كاملة وكل حاجة ولكن هنلاحظ ان ألوانها باهتة مش زى الشاشا اللى متعودين عليها من هواوى و ألوانها مش مشبعة زى الموبايلات التانية 
تانى عيب بقا ان الجهاز مفيهوش لمبة اشعارات و مش هتقدر تعرف اذا كان الموبايل ده جايلك فيه اشعار ولا لأ و لازم تفتح الموبايل علشان تعرف اذا جالك اشعار ولا لأ و بصراحة ديه حاجة غريبة من هواوى وخصوصا انها كانت بتحط لمبة الأشعارات فى أماكن غريبة بس برضه كانت بتحافظ على وجودها

تالت عيب ان نسخة ال Y9 2019 اللى بتيجى قبل ديه كان فيها ال 3Slot Design  يعنى ممكن تركب شريحتين اتصال و كارت ميمورى فى نفس الوقت اما الموبايل ال Prime بييجى بال Hyprid Slot يعنى ممكن تركب شريحة واحدة معا كارت ميمورى أو شريحتين اتصال و ديه حاجة رخمة ولكن كون ان الموبايل بييجى ب 128 جيجا بايت ذاكرة تخزين داخلية بيخلينا مش محتاجين لكارت ميمورى 
رابع حاجة ان الموبايل زى ما قلنا مبيجيش بشاحن سريع فى العلبة و الشاحن اللى بييجى بيكون 10W وشاحن عادى جدا فهتضطر تشتريله شاحن سريع 
وكمان الموبايل مصنوع كله من البلاستيك ولكن كنا نتمنى ان البلاستيك ييجى أحسن من كده شوية لأن البلاستيك هنا بيتخربش بسرعة جدا ولازم تركبله جراب ضرورى 

الكاميرات برضه فيها عيوب وانها بالليل هنلاقى الكاميرات سواء الخلفية أو الأمامية مش كويسة زى الصبح وبالنسبة للكاميرا الخلفية فبيكون فيها Noise شوية فى الصورة و التفاصيل بتختفى و مش هتحب تستخدمها خالص بالليل كمان خاصي العزل بالليل مش بتعزل كويس زى الصبح و نتمنى ان يكون فيه تحديث للسوفت وير فيما بعد يحل المشاكل ديه
و نفس الكلام ينطبق على الكاميرا السيلفى اللى هتلاقى انها بتديك صور ممتازة وتفاصيل كتيرة جدا فى الصبح و العزل كان بيتم بشكل ممتاز جدا ولكن بالليل هتلقى Noise فى الصورة و هتلاقى التفاصيل راحت شوية فبصراحة تجربة الكاميرات بالليل سيئة جدا 

كمان البصمة الخلفية الموجودة هنلاقى انها سريعة جدا ومفيهاش أى مشكلة وتقدر تعتمد ليها لكن الموبايل ما بيجيش ب Face Unlock و ديه مش حاجة حلوة بصراحة لأن الخاصية ديه هتستخدم الكاميرا ال Pop-Up الموجودة و ممكن هواوى تكون لغت الخاصية ديه علشان تحافظ على الكاميرا بدل ما تفضل تطلع وتنزل على الفاضى 

أخيرا علشان تحدد هل تشترى الموبايل ده ولا لأ هتلاقى اننا وضحنا العيوب و المميزات و مكن تشوف هل هيناسبك بالعيوب ديه أو مثلا مميزاته هتجذبك جدا لشرائه خصوصا ان سعر 4500 جنيه وصعب بالسعر ده تشوف المميزات ديه 
لكن بصراحة الموبايل ده هيديك أفضل استحواذ شاشة أو أفضل شكل Prestige ما بين الفئة السعرية ديه ومش هتلاقى الانبهارات ديه خالص فى أى موبايل ب 4500 جنيه 

Infinix Smart 3 Plus تجربة استخدام أرخص موبايل ب 3 كاميرات


الشركات دايما بتحاول تطور جدا فى الفئة اللى ما بين 1500 جنيه ل 3000 جنيه بطريقة كويسة جدا لأن فعلا مش شرط يكون معاك فلوس كتير علشان تجيب موبايل محترم 
الموبايل ده بصراحة فيه امكانيات عالية جدا بالنسبة لسعره وهوا تقريبا أول موبايل فى الفئة السعرية ديه ييجى ب 3 كاميرات خلفية 
و مش بس كده لأ كمان بيديك الشاشة الكاملة اللى هيا ال Water Drop Screen 
و اللى نوعها بيكون IPS ولكنها ممتازة جدا بالنسبة لموبايل بالسعر ده 
كمان الموبايل بيكون ب 2 جيجا بايت رام بذاكرة داخلية 32 جيجا بايت مش 16 جيجا بايت زى ما بنشوف فى الفئة السعرية ديه 
الموبايل كمان بيديك بطارية بسعة 3500 ميللى أمبير و اللى هتعيش معاك اليوم كله من غير أى مشكلة 

بصراحة الموبايل هنا بيديك امكانيات الى حد ما كويسة جدا بالنسبة لسعره و اللى هيكون ب 2000 جنيه 
و طبعا شاشته بتكون 6.2 انش بدقة +HD و اللى الحقيقة الشاشة ديه من أفضل الشاشات اللى ممكن تشوفها فى الفئة السعرية ديه
توليد ألوان الشاشة و السطوع تحت أشعة الشمس و الألوان نفسها أو جودة الشاشة نفسها ال Panel نفسها ممتازة جدا و ما تقلش حاجة عن الموبايلات الأغلى من كده كمان 
و حواف الشاشة الى حدما صغيرة ومش باينة ما عدا الحافةاللى تحت اللى تعتبر كبيرة ولكن ده شيئ عادى فى موبايلات الفئة ديه
و ضهر الجهاز و الأطار كله من البلاستيك و لكن لما نقلب الجهاز هنلاقى انه جاى بجليتر عاملة منظر جميل رغم انه مش جاى بألوان متدرجة  

و لكن اللى هيشدنا جدا منظر الكاميرات الخلفية ال 3 
و أول كاميرا بتكون 13 ميجا بيكسل وهيا الكاميرا الرئيسية بفتحة عدسة F1.8 و الكاميرا التانية بدقة 2 ميجا بيكسل و ديه علشان خاصية العزل 
أما الكاميرا التالتة انفينيكس حطتها علشان تديك اضاءة كويسة فى نور الليل و رغم انها كويسة ومفيدة فى التصوير بالليل ولكن كنا نتمنى انها تكون UltraWide أو أى حاجة تديك فايدة أكتر
ولكن لما تيجى تستخدمها بالليل هتلاقى ان التصوير هنا ممتاز جدا  و يعتبر أفضل تصوير ليلى هتاخده فى الفئة السعرية ديه و اللى دايما الكاميرات فى الفئة ديه لا يعتمد عليها أصلا لأنها بتكون كاميرات مستواها قليل جدا لكن ممكن نعمل استثناء لكاميرة الموبايل ده
كمان هنا تصوير الفيديو ممتاز جدا وبيصور Full HD و فيه ثبات وتقدر تعتمد عليه

عندنا كمان الكاميرا الأمامية اللى هيا بتيجى بدقة 8 ميجا بيكسل و اللى طبعا مش أفضل كاميرا أمامية و لكن هتقدر تصور بيها صور سيلفى عادى جدا و بالليل الجودة بتقل جامد للأسف مش زى الكاميرات الخلفية و لكن ما نستناش كاميرا سيلفى ممتازة بالسعر ده
و من الحاجات المهمة جدا فى الموبايل و اللى افتقدناها بشدة فى الفئة السعرية ديه وهيا البصمة اللى اختفت فى موبايلات زى Realme C1 و Galaxy M 10
كمان في خاصية فتح الجهاز ببصمة الوجه وتقدر تفتح الجهاز بمجرد ما تقربه من وشك و اللى برضه هيكون سريع زى البصمة 

و بالنسبة بقا لأداء الموبايل فهنلاقى انه بييجى بمعالج Helio A22 و هوا معالج 12 نانوميتر و هيوفر فى استهلاك البطارية بشكل كبير جدا 
و طبعا الرامات ال 2 جيجا بايت 
خلاصة استخدام الموبايل هتكون فى تطبيقات ال Social Media اللى لو استخدمتها الموبايل مش هيضايقك خالص و هتقدر تستخدمه بشكل طبيعى و مش هتلاقى الموبايل بيهنج ويعلق وتضطر تعمله اعادة تشغيل زى ما بيحصل فى موبايلات كتير فى الفئات السعرية ديه و ده لأن انفينيكس غيرت واجهة نظامها و الاصدار اللى على الموبايل هيكون أخر اصدار من أندرويد وأخر اصدار من واجهة انفينيكس  ال Xos
فبصراحة الواجهة مخففة الجهاز جدا و كمان المميز فى الجهاز ده انه يعتبر الجهاز الوحيد بالسعر ده اللى يقدر يشغل لعبة Pubg على أقل اعدادات بصورة كويسة جدا 

البطارية هنا 3500 ميللى أمبير و اللى تعتبر ممتازة جدا بعيدا عن الأرقام اللى ممكن تكون كبيرة و لكن تديك أداء أقل من المتوقع ولكن البطارية ديه مش هتخيب أمالك و ممكن تديك لحد 8 ساعات تشغيل من وقت عمل الشاشة و ده رقم ممتاز جدا 
و الموبايل بيشحن عن طريق منفذ شحن عادى مش Type C و ما بيدعمش الشحن السريع

بس من الحاجات الكويسة الموجودة فى الموبايل هوا وجود مدخل السماعات 3.5 ميللى اللى تعتبر مهمة جدا لكتير من المستخدمين و كمان وجود مكان لأستخدام شريحتين اتصال معا كارت ميمورى فى نفس الوقت 

الموبايل بصراحة ك Package على بعضه ب 2000 جنيه هيديك أداء كويس جدا و مش هيهنج أو يعلق وده على حسب استخدامك و طبعا هتقدر تلعب عليه ببجى 
و طبعا لو انتا بتدور على جهاز مناسب ويديك أداء وكاميرات معقولة بسعر قليل يبقى الموبايل ده مناسب ليك جدا 

Iphone 7 128G بسعر ٦٠٠٠ ج بدلا من ١٢٠٠٠ ج

ايفون 7 اوريجينال  كسر زيرو  مساحة 128 جيجا 
 بدون اي خدوش وارد دبي استعمال اسبوع
 فقط ضمان 14 يوم لون اسود
بدون علبة او اكسسوارات 
الجهاز فقط