BMW E46 2001 المواصفات الشاملة وسعر



BMW E46 2001
شركة BMW من أفضل الشركات الألمانية ومن أفضل شركات السيارات فى العالم ودايما كل موديلاتها بتبقى مميزة عن الشركات التانية لأنها بتجمع بين الشراسة فى الشكل وقوة الأداء معا الفخامة و الراحة و الموديل وسلسلة E46 بالذات من أحسن صناعات الشركة و لو لعبت Need For Speed MostWanted هتفتكر أكيد العربية معا فرق بسيط انها كانت E46 M3 GTR اللى كانت نسخة محدودة من السلسلة ديه ولكنهم متشابهين فى الشكل واللى هنتكلم عنها النهاردة هيا 318i

مميزات العربية
1- الشكل القوى الهجومى اللى هيخليك حاسس انك راكب عربية سباق مش عربية Sedan عادية وفى نفس الوقت الفخامة اللى هتحسسك انك تقيل فى نفسك وانتا راكبها 
2- طبعا الشركات الألمانية مبتهزرش ومش هتلاقى راحة داخلية أحسن من كده وكمان خامات التصنيع عالية جدا لأن كلها مصنوعة من الجلود الطبيعية
3- كماليتها كتيرة زى طبعا التحكم الكهربى فى الكراسى والشبابيك و امكانية حفظ الوضعية و التكييف اللى بيشتغل باللمس و ال Air Bags العربية بصراحة شاملة كل حاجة
4- ثبات عالى وعوامل أمان زى مانع الانزلاق و ABS و 6 Air Bags 
5- العربية تقيلة وراسية ومش هتتمرجح منك لو سايق بسرعة بس مشكلتها بتاكل المطبات بغباء

خصائص العربية
العربية سيدان بتيجى ب 4 أبواب مش بابين زى الكوبيه وده يخليها الى حد ما سيارة عائلية 
الكنبة مريحة معا فرش جلد ولكنها مش واسعة أوى 
فى نوعين من العربية البيس لاين و الهاى لاين 
الفرق بينهم ان الهاى لاين بيبقى فيها فتحة سقف وشكل الدركسيون مختلف
بالنسبة لشكل العربية فهنلاقى ان شكلها انسيابى معا فوانيس خلفية جميلة جدا وشكلها مميز وكمان الكشافات شكلها رهيب جدا و الجنوط اسبور 
العربية بتيجى بموتور فهو معروف بالكود N42B20 وهو 1995 سى سى بقدره حصانية 143 حصان وبيكون 16V
و أقصى عزم للعربية 200 Nm or 147 lb.ft @ 3750 rpm


الفتيس 
4 سرعات بيشتغل أوتوماتيك ويدوى  
و نوعه استيبترونيك وده أفضل من الأتوماتيم طبعا
 الفتيس فيه 3 أنظمه ال d و هو الدرايف العادى و ال d/s هو القياده الرياضية و فى النظام ده ممكن تلاقى اختلاف بينه وبين ال d فى وقت قيام الفتيس بنقل السرعة لسرعة تانية و ممكن تلاقى العربية هبطت شوية لثبات أكتر و ال m هوا النظام اليدوى العادى و فيه 4 سرعات فقط 
و بتحريك عصاية الفتيس لتحت هتبدأ فى زياده الغيار و بتحريك عصاية الفتيس لفوق يبدأ فى نقص الغيار, مع العلم إنك و من الثبات ممكن تدى ال 4 غيارات لكن لو استنيت لمده لا تزيد عن 2 ثانيه هتلاقى الفتيس من ذات نفسه بيرجع إلى الغيار رقم 2 لأستحالة تحريك السيارة على الغيار رقم 4!

 كنوع من زيادة فى الأمان للموتور
 إذا كنت مثلا على وضعية ال M (اليدوى) و كان على الغيار رقم 3 و زودت بنزين على الغيار من غير ما تدى الرابع هتلاقى ان قبل ما مؤشر الأر بى إم يتحرك للمنطقه الحمراء هيقوم الفتيس من نفسه بالنقل للغيار الأعلى اللى هوا 4 و الكلام ده فى كل الغيارات!
أقصى سرعة للعربية 218km/h H أو 135 ميل فى الساعة
و ممكن تتسارع من الصفر ل 100 كيلومتر فى الساعة فى 9.3 ثانية
نظام الفرامل فى العربية بيكون ديسكات فى الأمام و ديسكات فى الخلف
سعة الخزان 440 لتر و استهلاك العربية 7.2 لتر لكل 100 كيلومتر

عيوبها 
1- هتحتاج دايما تأكد من إن عفشة السيارة بحالة جيدة لأنها من أسباب تشريخ من ناحية البطاحات الأماميه! يعنى مثلا كل 6 شهور أو 3 شهور زيارة للميكانيكى للتأكد من إن العفشه جيده ولا تحتاج صيانات أو تغييرات

2- البطاحات بتتصاب بشروخ حوالين المسامير وممكن تشوفها بوضوح لما تفتح غطاء الموتور و السبب هنا هو استهلاك المساعدين و اهمال تغييرهم مما يؤدي الي حدوث شروخ بالبطاحات و هو عيب شائع في السيارة 
3- الحساسية الزائدة لحساسات الايرباج بالسيارة بمعنى ان السيارة ممكن تفتح ايرباج سائق و باب ايسر على مطب هواء شديد على سرعة عالية .. و لكنمش بالشكل المخيف .. حدثت في بعض السيارات و الاغلب لم يحدث
4- العربية واطية شوية وده بيخليها تاكل المطبات وممكن تتشرخ بسهولة

سعر العربية
العربية سعرها تقريبا 160000 جنيه وقطع غيارها الجديدة موجودة بالخارج والاستيراد لكن ال E46 معروفة بارتفاع أسعار قطع غيارها