5G ايه هيا شبكات الجيل الخامس


منذ فجر التاريخ و البشر بيحاولوا ابتكار وسائل للاتصال عن بعد لتسهيل التواصل عبر المسافة فبدأوا باستخدام الاشارات و بعدين الدخان و استخدام انعكاس أشعة الشمس لحد ما العالم Samuel fb Morse اخترع التواصل عبر مسافات كبيرة من خلال الكابلات مستخدما شفرة مورس الشهيرة اللى اتسمت على اسمه واللى عملت ثورة فى عالم الاتصالات 

بعد كده تحول اهتمام العلماء لايجاد طريقة للتواصل عن بعد بدون استخدام كابلات أو توصيلات لتبدأ المحاولات من خلال الهواتف اللاسلكية و بعدها شبكات المحمول بداية من شبكات الجيل الأول لحد ما وصلت لشبكات الجيل الرابع 

تطور شبكات المحمول كان لعدة أسباب لكن أهمها هوا تحسين مستوى الخدمة اللى بتوصل للمستخدم سواء مكالمات صوتية نقية أو أتصال بيانات عالى السرعة 
وطبعا شبكات الجيل الرابع 4G بتوفر مكالمات صوتة بصوت HD و اتصال بيانات بيوصل فى بعض مناطق العالم ل 1.2 جيجا بايت فى الثانية الواحدة و بعض الناس بتعتقد ان السرعة ديه أكتر من اللى ممكن أى حد يحتاجها خصوصا ان الأجهزة اللى بتتصل بالشبكات ديه مش هتقدر تستغل السرعة الفائقة ديه 

طيب ايه الدافع لتطوير الشبكات ديه وهيا تعتبر سريعة جدا دلوقتى ؟؟
الثورة التقنية فى السنوات الأخيرة أخدت اتجاه واضح نحو تقنية IOT أو ما يعرف ب أنترنت الأشياء بمعنى ان المنازل هتتملى بالحساسات و الالكترونيات و الأجهزة المنزلية اللى هتتصل بالانترنت و ده غير ان مصنعين السيارات بيتجهوا بقوة تجاه تصنيع العربيات المتصلة بالانترنت و السيارات ذاتية القيادة اللى هتحتاج اتصال دائم و موثوق بالانترنت 
كل ده معناه ان مليارات الأجهزة هتحتاج قريبا جدا الاتصال بشبكات المحمول و اللى للأسف الشبكات الجيل الحالى ما تقدرش تدعم حاجة زى كده

و الهدف من تطوير شبكات الجيل الخامس 5G كان كالتالى :-

  • أولا زيادة قدرة الشبكات على استيعاب عدد أكبر من الأجهزة ليصل الى 100 مليار جهاز حول العالم 
  • ثانيا استهلاك أقل للطاقة فى الأجهزة ديه حيث ان الكثير منها هيعتمد على مصادر ذات طاقة محدودة وكذلك لدعم اتفاقيات ترشيد الطاقة و الحفاظ على المناخ
  • ثالثا زيادة سرعة الاتصال ليصل الى 10 جيجا بايت فى الثانية 
  • رابعا تقليل الزمن اللازم للاتصال من أجزاء فى الثانية الى 1 على 1000 من الثانية لأن سرعة الاستجابة مهمة جدا وتحديدا فى العربيات 
و على عكس تقنيات الشبكات القديمة الجيل الخامس بيحتاج لبنية تحتية أقل بكتير و فى نفس الوقت بيدعم اتصال بعدد أكبر من الأجهزة لأنه بيستخدم الأجهزة المتصلة بيه نفسها علشان تكون نقاط اتصال يعنى ان الشبكة تستطيع تغطية مساحة و عدد أكبر من الأجهزة مستخدمة بنية تحتية أقل بكتير 

ده غير ان ال 5G غير مقيدة بنطاق ترددى مما يعطى الأجهزة المتصلة الحرية فى اختيار النطاق المناسب و الأقل ازدحاما للحصول على أفضل اتصال و حسب منظمة ال 3GPP المسئولة عن وضع معايير الاتصال ان من المتوقع اننا نشوف شبكات الجيل الخامس فى بداية عام 2020 الا ان في بعض الشركات بتحاول بقوة تقديم الموعد ده 

و هنلاقى فى أمريكا شركتين زى Verizon و AT&T بدأوا فى تجربة شبكة الجيل الخامس على نطاق ضيق 
و نفس الكلام فى شركة Nokia و Huawei و Samsung و Qualcomm اللى بدأوا فى اجراء الاختبارات و وضع الخطط لتصنيع الأجهزة المتوافقة معا الجيل الخامس 

عربيا أعلنت هيئة الاتصالات السعودية أنها هتوفر شبكات الجيل الخامس بدءا من عام 2020 و كانت المملكة من أوائل الدول العربية اللى أتيحت فيها شبكات الجيل الرابع 
بينما كانت مجمعة اتصالات فى دبى قد أجرت أول تجربة على التقنية باستخدام الموجات الميلليمترية و أجرت شركة فودافون فرع قطر تجربة أو اتصال بالتقنية ديه 
و عالميا أجرت اسبانيا تجربة مكالمة فيديو بالتقنية ديه 
لكن بشكل عام عربيا فيه تأخر فى البنية التحتية وكتير من المناطق لحد دلوقتى ما بيوصلهاش شبكات ال 4G بالمستوى المطلوب و لحد اللحظة ديه فى كتير بيستخدموا شبكات ال 3G